2/7/18 驟雨 克羅地亞之旅 2018 Sue & Raymond 5 - 10 June 2018 #thesweetestcoupleineurope Ep.2 Dubrovnik海景酒店/掠水巴士/Lovrijenac最期待的畫面 Day 5 - 5 June (Tue) 由巴士大站步行去我地所住的Hotel Petka,需要不多於十分鐘. 不過唔明點解外國既酒店咁興響門口整條樓梯先上到門口,又唔整條斜路,搬行李真係搬餐死. 呢間酒店無論外面或者內籠,其實睇得出都有相當一段時間,設施都幾舊下,間房亦好似好耐無人用過咁,haha. 不過Dubrovnik呢度實在太多酒店及Airbnb,而且舊城區果邊仲多仲方便,Gruz呢邊少人啲都正常. 我地亦因為舊城區果邊住宿貴,先揀遠少少既呢邊入住,差唔多價錢,但呢邊有個海灣碼頭既景,感覺CP值高得多. 人生無幾可,可以揀海景房,呢個露台180度風景真係要一睇再睇,唔好蝕俾佢. 點擊圖片放大 +14 Room tour完,就出番去搵地方兌錢,再過對面巴士站搭local bus去舊城區. 想講呢度既巴士公司係掠水掠得好勁,一程十零分鐘車程的巴士竟然收人十幾蚊港幣,係咪痴線架,真係不如去搶,lol. 班次都算係密,但架架巴士都逼滿人,爆到頂閘上唔到,因為呢度實在太多遊客喇. 心諗呢間公司都賺到發,車又唔係多,但爆滿晒,車費又收得咁貴,真係玩晒. 提議大家如果可以的話盡量響某啲有售票亭既巴士站,透過售票亭買票係12kn,但上車俾錢就要15kn. 響Dubrovnik坐巴士就好似坐中大校巴,就算你緊握扶手都會西黎西去,因為Dubrovnik多山路多彎路,所以都搭得幾辛苦下. 大約四點半,終於黎到傳說中的Dubrovnik Old Town舊城區,行陣紀念品店,來到城牆前近沙灘的位置. 淨係呢個海景都好靚,已經影左唔少相.連埋城牆和塔樓做背景,成個畫面好獨特,有少少震攝力. 用Google Map搵條小路,拾級上上,登上Lovrijenac,又名St. Lawrence Fortress,中文名係羅維里耶奈克要塞,係一個堡壘及劇場. 進入Lovrijenac參觀要買入場票,50kn,如果之後再上Dubrovnik城牆就到時另加100kn. 其實Lovrijenac呢座野外邊睇唔係好靚,無乜特別,之所以專程上黎,係因為呢個位望番去舊城區係極級靚,係絕佳位置! 好多Dubrovnik既postcard,磁石,圖畫,照片,就係取景之呢度既塔頂. 響呢度,可以欣賞到舊城區既城牆外的海景,城牆內的紅屋頂,而且城牆上的建築,一覽無遺. 花左咁多錢,咁多時間,呢度就係另一個我地目標要來既地方,要親身踏足,親眼望見最期待的畫面.能夠完成可說是無憾了. 原先以為呢個咁經典咁標誌性的拍照景點應該會好多人好熱鬧,但點知人丁單薄,可能因為要行上山而且偏離舊城區,大部分遊客及旅行團都skip了無上來,咁就真係蝕大本了. 早知係咁我地就拎埋腳架過黎慢慢影啦,haha.可以咁舒服咁寧靜去欣賞呢個城鎮,已經心滿意足. 點擊圖片放大 +41
