自由行去立山黑部「阿爾卑斯山脈路線」2016年優惠套票＋交通指南 立山黑部係日本其中一個好受歡迎嘅旅遊景點，尤其係每年初春季節開始，很多遊客會專誠嚟睇雪の大谷！由於受到地理氣候所限，立山黑部每年都會喺冬季期間全線封閉，一般由前一年11月中直至之後一年4月中。2016年嘅開山日就係4月16日－11月30日，而開山日（全線開通）就係「雪の大谷」登場之日，今年雪之大谷喺4月16日－6月22日都有得睇！ 位於日本北陸地區嘅立山黑部路線隨住北陸新幹線通車，由日本各地前往立山黑部比之前更快捷、更方便。今年陸續有多張優惠票推出，相信今年到立山黑部旅行嘅遊客會更加多。 大家遊立山黑部一般會採取單程路線，仲可以完全體驗路線內7種交通工具，包括：吊車、地底無軌電車、登山纜車以及高原巴士等等。 往立山黑部交通 由於立山黑部係封閉嘅區間路線，基本上大家只可以選擇由北陸地區嘅立山上山，或者由中部地區嘅信濃大町(松本附近)上山。好多香港人遊立山黑部都會從名古屋出發，其實飛東京、名古屋、大阪都可以去到立山黑部，所以想同大家講下。 對我嚟講，去得立山黑部玩，價錢唔係最重要，最重要係睇下自己想從日本邊度出發同行程嘅安排。 立山黑部優惠套票介紹： 1. （名古屋等中部地區出發）JR東海全新立山黑部開山期間限定「阿爾卑斯、高山、松本地區周遊券」，售價17500円，連續5天有效。 JR東海今年推出全新外國遊客專用嘅「阿爾卑斯、高山、松本地區周遊券」，屬於期間限定嘅商品，因為只有立山黑部開山期間先用得到，使用日是4月16日至11月13日，可以連續5天使用。但必須要先喺海外指定旅行社購買引換券，到達日本後喺指定售票處換領真正嘅周遊券。 由名古屋出發，大家可以利用經過下呂及高山到富山嘅東海道 + 高山本線、立山黑部阿爾卑斯路線全線、信濃大町至名古屋之間嘅大系及中央本線。以上所有路線都是可以在有效期內任坐自由席，亦包括咗4程JR在來線普通車指定席。 3. （關東或關西出發）優惠價遊立山黑部之選，新版「立山黑部加購票」售價9,000円，開山期間全日子可用。 這張「立山黑部加購票」專門針對外國旅客，所以只限持有外國護照嘅旅客購買。舊年由JR東日本獨賣，所以得JR東日本主要購買點先買到，例如東京兩大國際機場，另外喺新宿駅及長野駅等。今年就加入JR西日本，所以就算是喺關西地區出發嘅朋友都買到、用到，購買點包括以下車站售票處：大阪、京都、新大阪、金沢（金澤）及富山。但有一點需要留意，就係關西機場係冇得賣㗎！ 講到明係「加購票」，所以係唔包前往立山黑部路線嘅交通，東京出發的話要先乘坐新幹線到長野後才使用，亦可以搭配14天內任選5天嘅「JR東日本鐵路周遊券（長野、新潟地區）」（18000円「JR東日本鐵路周遊券（長野、新潟地區）＋9000円「立山黑部加購票」＝27000円」 而喺關西地區出發就係先坐特急到金沢，再轉新幹線到富山。同樣地，也可以利用PASS，就係7天「關西＆北陸地區鐵路周遊券」，售價15000円 (日本國內買是16000円)。（15000円「關西＆北陸地區鐵路周遊券＋9000円「立山黑部加購票」＝24000円」 如果打算一次過玩盡關東加關西再加北陸仲要去埋立山黑部，咁就最好買全新「北陸拱門PASS」，可以連續使用7天。（24000円「北陸拱門PASS」＋9000円「立山黑部加購票」＝33000円） 3. （關東或關西出發搭配加購票）全新「北陸アーチパス(北陸拱門PASS)」16年4月登場！售價24000円，7日間玩盡東京、北陸及關西，仲可以坐北陸新幹線全線。 「北陸アーチパス」由JR東日本及JR西日本合作推出，pass可以涵蓋到全線北陸新幹線、北陸地區及關西，售價是24000円，有效期七天，最適合東京入、大阪走(或相反)，主要目的地係北陸地區嘅外國遊客！ 「北陸アーチパス」係全年可用嘅套票，跟其他同類套票一樣，價錢有兩個。海外預購會平D，售價24000円。而喺日本國內購買都得，但貴D，售價25000円，兒童票半價。 這張PASS一經啟用就係連續7天使用，涵蓋線路包括：成田空港到東京的一段、羽田空港到東京嘅單軌列車、東京都心主要山手線附近地區、東京至金沢之間嘅北陸新幹線，北陸地區主要JR路線及部分第三鐵道會社、關西地區主要JR路線以及關西各地往關西空港一段等。基本上就涵蓋了東京都心、北陸及關西的JR可到達地區，亦包括咗往來主要國際機場嘅交通，要另外俾交通費嘅機會不大。 而在有效區間內是7天自由任乘，包括新幹線、特急、急行列車、普通列車的普通車指定席也可以乘坐的，當中特例是往來關西機場嘅特急「はるか」，只能坐普通車自由席。但要留意，如果要前往高山或白川鄉的話，仲有立山黑部路線等，就要另購乘車券。 4. （JR西日本）「立山黒部アルペンきっぷ」，大阪出發24260円起，連續8天可用。 兩年前，我趁住由東京出發嘅北陸新幹線未啟用就去立山黑部，因為唔鍾意太多人，要同人逼餐懵。我個人比較反傳統，冇從名古屋出發，反而從比較少人出發嘅大阪到立山黑部玩。 個人比較怕麻煩，亦唔想喺香港預購pass，所以一到關西空港就買咗呢張「立山黒部アルペンきっぷ」pass。呢張pass包晒由大阪市區到北陸地區（兩條路線）嘅交通同埋立山黑部路線7種交通工具嘅費用，最啱我呢種成日唔見Pass嘅傻瓜用。（嗰時未有上文講到嘅2／3號套票、優惠券售賣） 由於張pass係由市區開始計，所以要另買一張由空港到市區嘅乘車券。（呢張乘車券只係作為補差額，大家唔使真係去到杉本町落車。） 我哋由關西空港出發，原本要搭特急「はるか」去新大阪站，預計只係30mins內就到，點知衰多口走去問下車站職員有冇搭錯，點知其實佢哋都唔識，老點咗我哋去坐架普通區間車，遲咗成個幾鐘先去新大阪站，搞到我miss咗兩架開去富山站嘅特急，plan好嘅行程亂晒！（所以話呢，做咗research就信自己，好過信車站職員，因為佢哋都未必知道所有pass嘅用途或者路線。而且日本人做嘢太一板一眼，靈活少少都唔識。） 好啦！終於搞咗一輪，終於嚟到新大阪站12號月台等「特急サンダーバード」前往富山站。 由2015年3月開始，大家只可以乘搭特急サンダーバード前往金沢，再轉北陸新幹線前往富山站。 前往立山黑部阿爾卑斯路線說明 立山黑部有兩個上山嘅入口，一個喺富山，另一個喺信濃大町。無論喺名古屋、大阪定係東京，去富山都會快D同直接D。所以我係由富山進入立山黑部，再從信濃大町走。（當然大家亦可以從信濃大町入立山黑部，再從富山走。） 立山側入口 東京出發：東京駅 > 北陸新幹線 > 富山駅(車程約2小時8分鐘) > 富山地方電鉄 > 立山(車程約1小時) 名古屋出發：名古屋 > 特急ワイドビュー「ひだ」 > 富山駅(車程約3小時40分鐘) > 富山地方電鉄 > 立山(車程約1小時) 大阪出發：大阪 > 特急サンダーバード > 金沢(車程約2小時45分鐘) > 北陸新幹線 > 富山駅(車程20分鐘) > 富山地方電鉄 > 立山(車程約1小時) 信濃大町側入口 東京出發：東京駅 > 北陸新幹線 > 長野駅(車程約1小時30分鐘) > アルピコバス > 扇沢(車程約1小時45分鐘) 名古屋出發：名古屋駅 > 特急ワイドビュー「しなの」 > 松本駅(車程約2小時) > JR大系線 > 信濃大町(車程約55分鐘) > アルピコバス > 扇沢(車程約40分鐘) 大阪出發：大阪 > 新幹線 > 名古屋駅 > 特急ワイドビュー「しなの」 > 松本駅(車程約2小時) > JR大系線 > 信濃大町(車程約55分鐘) > アルピコバス > 扇沢(車程約40分鐘) 無論係從東京、大阪、名古屋進入立山黑部，定係離開立山黑部返到東京、大阪、名古屋都可以參照呢個鐵路圖表嘅線路搭車。 立山黑部「阿爾卑斯山脈路線」－ http://www.alpen-route.com/
